6 July 2017
Mae tîm Fluoxetine, Learning and Memory in Epilepsy (FLAME) Prifysgol Caerdydd yn gwahodd pobl ag epilepsi llabed amserol mesial (TLE) i gymryd rhan mewn astudiaeth ymchwil.
Mae’r treial yn archwilio triniaeth bosibl i wella anawsterau dysgu a chofio mewn pobl yr effeithir arnynt gan TLE, problem gyffredin i unigolion sy’n byw gyda’r cyflwr hwn.
Ar hyn o bryd nid oes unrhyw driniaethau ar gael i frwydro yn erbyn problemau dysgu a chof mewn TLE. Rydyn ni’n gwybod bod celloedd ymennydd newydd yn cael eu ffurfio’n gyson (niwrogenesis) yn hippocampus yr ymennydd, sy’n bwysig ar gyfer dysgu a chofio. Rydym hefyd yn gwybod bod llai o niwrogenesis mewn pobl â TLE difrifol, a allai helpu i esbonio rhai o’r anawsterau y mae cleifion yn eu hadrodd.
Mae ymchwil blaenorol wedi dangos y gall meddyginiaeth a ddefnyddir yn helaeth o’r enw fluoxetine adfer cynhyrchiad celloedd newydd yn yr ymennydd. Gall hefyd adfer y gallu i ddysgu tasg ddysgu anodd mewn model anifail o epilepsi’r llabed amserol sy’n dangos yr un patrymau o broblemau dysgu a chof a welir mewn pobl â TLE.
Mae FLAME yn archwilio a all fluoxetine wella dysgu a chof mewn ffordd debyg mewn cleifion â TLE.
Rhwng nawr a mis Chwefror 2018, mae tîm FLAME yn anelu at recriwtio hyd at 20 o gleifion â TLE i gymryd rhan yn y treial hwn. Bydd gwirfoddolwyr sydd â diddordeb yn cael eu gwahodd i fynychu Ysbyty Prifysgol Cymru (UHW) ar gyfer asesiad cymhwysedd cychwynnol, a fydd yn cynnwys prawf gwaed, holiaduron a sgan MRI. Yna bydd cyfranogwyr addas yn cael eu gwahodd i gwblhau cyfres o dasgau dysgu a chofio ym Mhrifysgol Caerdydd cyn ac ar ôl cwrs dau fis o driniaeth fluoxetine.
Hoffai’r tîm glywed gan unrhyw un (18-65 oed) sydd wedi cael diagnosis o TLE sy’n fodlon teithio i Gaerdydd i gwblhau cyfres o asesiadau dysgu a chof (treuliau teithio wedi’u talu).
“Ar hyn o bryd nid oes unrhyw opsiynau triniaeth effeithiol ar gael ar gyfer problemau cof a dysgu mewn cleifion â TLE,” meddai Dr Mark Postans , Ymchwilydd Cyswllt yn Sefydliad Ymchwil Niwrowyddorau ac Iechyd Meddwl (NMHRI) Prifysgol Caerdydd.
“Drwy brofi effeithiolrwydd clinigol cyffur rhad, sydd ar gael yn eang ac sy’n cael ei oddef yn dda i frwydro yn erbyn y problemau hyn, mae FLAME yn mynd i’r afael ag angen clinigol pwysig heb ei ddiwallu ac efallai y bydd yn helpu’r rhai sy’n byw gyda’r math hwn o epilepsi un diwrnod.”
Mae FLAME wedi’i ariannu gan Epilepsy Research UK ac Uned BRAIN , ac yn cael ei arwain gan Brif Ymchwilydd y prosiect, yr Athro William Gray . Derbyniodd yr astudiaeth gymeradwyaeth foesegol gan Brifysgol Caerdydd, Pwyllgor Moeseg Ymchwil GIG Cymru 3, yr Asiantaeth Rheoleiddio Meddyginiaethau a Chynhyrchion Gofal Iechyd (MHRA) a Swyddfa Ymchwil a Datblygu Bwrdd Iechyd Prifysgol Caerdydd a’r Fro.
Gall unrhyw un sydd â diddordeb gysylltu â thîm treial FLAME i drafod y treial neu ofyn am lyfryn gwybodaeth drwy e-bostio FLAME@cardiff.ac.uk neu ffonio 02920 688 590 .
Search for:
