Ym Mhrifysgol Caerdydd, rydym wedi datblygu arbenigedd unigryw mewn meithrin meinwe ymennydd dynol byw ar gyfer ymchwil. Mae hyn yn ein helpu i gadarnhau bod cyffuriau mewn gwirionedd yn cyrraedd eu targedau ac i wirio am sgîl-effeithiau eraill fel gwenwyndra (sy’n disgrifio lle gall meddyginiaeth achosi niwed i gelloedd a meinweoedd yn hytrach na bod o fudd). Mae gwybod y math hwn o wybodaeth yn gynnar yn ei gwneud hi’n fwy tebygol y bydd y naid o brofion labordy i dreialon dynol yn llwyddiannus.
Mae ein hymchwilwyr yn cynhyrchu meinwe ymennydd byw o samplau llawfeddygol oedolion a ffetysau ar gyfer ymchwil cynhyrchion meddygol uwch. Nid yw’r samplau meinwe byw hyn wedi’u cyfyngu i’w defnyddio mewn unrhyw un clefyd – gall ymchwilwyr eu defnyddio i astudio ystod o anhwylderau gan gynnwys clefyd niwroddirywiol, epilepsi a chanser yr ymennydd.
Rydym hefyd yn gweithio gyda phartneriaid i baratoi ein cynnyrch celloedd ar gyfer ei dreial dynol cyntaf mewn pobl â chlefyd Huntington. Ar yr un pryd, rydym yn patentio ein proses weithgynhyrchu ar gyfer cynhyrchu celloedd ymennydd arbenigol (niwronau pigog canolig) sydd eu hangen ar gyfer y driniaeth hon.
Mae ein hymchwilwyr ym Mhrifysgol Abertawe yn gweithio ar dechnegau uwch sy’n dadansoddi brasterau (lipidomeg), genynnau, a meinwe’r ymennydd. Nod y gwaith hwn yw deall yn well y gwahaniaethau biolegol mewn clefydau’r ymennydd sy’n cynnwys dirywiad a llid. Bydd y canfyddiadau’n helpu i ddarganfod therapïau uwch newydd, nodi ffyrdd o fesur effeithiolrwydd triniaeth, a dewis grwpiau cleifion priodol ar gyfer treialon clinigol.
Search for:
